Artista Joven Timoroan Muda Futuru ho Kerámiku Liu Husi USAID nia Ajuda

Dili, Timor-Leste – Juventude Timor-Leste hasoru futuru ne’ebé la serteza iha nasaun post-konflitu nia laran ne’ebé liu metade husi ninia populasaun ho idade 30 ba kraik no taxa dezempregu ba joven besik porsentu 10.5, maibé juventude artista timoroan na’in haat iha ona futuru ne’ebé nabilan bainhira hetan apoiu husi USAID nia Projetu Turizmu Ba Ema Hotu.   

Jose Pereira, Aderito De Jesus, Zacarias Freitas and Domingos Ramos Salsinha – sira hotu ho idade 20 – hare ona mudansa iha sira nia moris depois tuir kursu treinamentu ba produsaun kerámiku iha Ajénsia Dezenvolvimentu Timor-Leste (ETDA) ho fundu husi USAID. Sira hetan selesiona husi sira nia talentu artistiku hodi simu treinamentu tékniku husi master kerámiku ho kombinasaun ho abilidade negósiu ne’ebé sira presiza hodi faan sira nia vazu.  

Timor-Leste sempre iha tradisaun ba halo kerámiku hodi faan iha rai laran. Projetu ETDA lori ona atividade artezenatu ne’e ba nivel ne’ebé foun, forte liu tan, pródutu ne’ebé nabilan, no hatudu motiv kultural ne’ebé dekorativu, dezeñu ne’ebé bele hatudu iha merkadu turista nian.     

Governu Timor-Leste identifika ona turizmu hanesan dalan ida importante ba diversifika ekonomia ne’ebé dependente ba mina. Permite populasaun joven sira hodi dezenvolve abilidade produtiva la’os de’it ajuda ho meta ida nee maibé mós ajuda muda nasaun tuir dalan ba auto-determinasaun.

USAID nia Diretór Misaun Jim Wright louva ho inisiátiva ne’e, no hatete “Timor-Leste hetan bensa ho populasaun joven ne’ebé bo’ot no enerjètiku hodi uza sira nia enérjia hodi harii futuru ne’ebé di’ak ba sira nia aan no ba sira nia nasaun. Infelizmente, sira barak mak lahetan servisu. Ha’u espera katak liu husi parseria entre USAID nia Projetu Turizmu Ba Ema Hotu no ETDA bele ona permite juventude sira ne’e hodi uza sira nia talentu hodi bele hetan rendimentu ba sira nia moris no halo sira nia nasaun bele atrai turista barak liu tan.”  

Salsinha nudar dezempregu ida no foti ona dalan ne’ebé laloos iha ninia moris. Nia hatete liu husi kursu ne’e lori ona nia ba dalan ne’ebe foun.

“Ha’u nunka hanoin ha’u sei bele kreativu los ou bele atu aprende abilidade foun,” nia hatete. “Ha’u orgullu tebes nudar juventude timoroan ida tanba ha’u bele halo kerámiku lokal ne’e, ha’u hatene, hau promove ha’u nia nasaun ba mundu tomak no espesialmente promove turizmu Timor-Leste nian ne’ebé mak ha’u fiar sei halo ema hotu kontente.”

Kerámiku foun ne’e sei faan husi loja foun iha ETDA nia oin no osan sei tama iha joven artista na’in haat nia bolsu. Loja ne’e simu ona orden husi governu hodi uza sai hanesan prezente ba visitor sira no marka sai mós hanesan istória nasaun nian. Kerámiku ne’e haruka on aba Melbourne, Australia, hodi fornese ba merkadu internasionál. 

Artista sira apresia tebes ba oportunidade ne’ebé USAID no ETDA fornese liu husi treinamentu ne’ebé iha, loja no rendimentu no agora daudauk sira fahe ona sira nia abilidade foun ne’e ba estudante sira seluk.

“ha’u gosta pinta tanba liu husi pinta ha’u bele promove ha’u nia nasaun. Ho dalan ida ne’e, ha’u fiar ha’u nia kontribuisaun nudar timoroan sei kontribui ba dezenvolve turizmu iha Timor-Leste,” De Jesus hatete, ne’ebé husik hela ona eskola maibe agora bele sai treinadór no aprende English.

Jestór Seniór ETDA Januario Mok nota iha dezenvolvimentu ba artista na’in haat ne’e. 

“Ami nia treinadór nain haat hatudu ona mudansa iha perspetiva, ne’ebé mak sujere impaktu iha sira nia moris liu husi auto de konfiansa, orgullu ho abilidade ne’ebé sira iha no hetan poder,” nia hatete.

Talvés Freitas fahe meta ho USAID no nudar artista ne’ebé di’ak: “Ha’u iha mehi hodi halo módelu kerámiku ne’ebé oi-oin iha futuru no promove ha’u nia nasaun ba ema iha mundu tomak.”