លោក សុង សុវណ្ណពិសិទ្ធ
ទីកន្លែងកំណើត៖ ខេត្តបាត់ដំបង
គ្រឹះស្ថានឧត្ដមសិក្សា៖ និសិត្សឆ្នាំទី៤ នៅសាកលវិទ្យាល័យអាមេរិកាំងភ្នំពេញ ជំនាញគ្រប់គ្រងពាណិជ្ជកម្ម
មុខតំណែង៖ អ្នកហាត់ការផ្នែកហិរញ្ញវត្ថុ នៅទីភ្នាក់ងារជំនួយអាមេរិក (USAID) កម្ពុជា
ពិសិទ្ធបានសម្រេចចិត្តដាក់ពាក្យហាត់ការជាមួយទីភ្នាក់ងារជំនួយអាមេរិក (USAID) កម្ពុជា ដើម្បីយកចំណេះដឹងទៅបំពេញគោលដៅសំខាន់មួយរបស់ខ្លួន គឺបន្តការសិក្សាថ្នាក់អនុបណ្ឌិតនៅសហរដ្ឋអាមេរិក។ ពិសិទ្ធក៏ធ្លាប់មានបទពិសោធន៍ហាត់ការនៅក្រសួងពាណិជ្ជកម្មពីមុនមកដែរ។
ពិសិទ្ធមានចំណាប់អារម្មណ៍សិក្សាផ្នែកវិភាគអាជីវកម្មនៅសហរដ្ឋអាមេរិក ព្រោះចង់បានបទពិសោធន៍ផ្ទាល់ទាក់ទងនឹងវិស័យនេះ ដូច្នេះហើយទើបពិសិទ្ធចូលមកធ្វើការនៅការិយាល័យគ្រប់គ្រងហិរញ្ញវត្ថុជាមួយ USAID ដើម្បីពង្រឹងជំនាញបន្ថែម។
ពិសិទ្ធមានសារផ្ដាំផ្ញើដល់យុវជនដែលចាប់អារម្មណ៍ធ្វើការជាមួយ USAID ថាអ្នកទាំងអស់គ្នាមិនគួរស្ទាក់ស្ទើរនោះទេ និងត្រូវចាប់យកគ្រប់ឱកាសដើម្បីសម្រេចគោលដៅរបស់ខ្លួន។
ពិសិទ្ធនិយាយថា៖ ធ្វើវាជាមុនសិន ប្រសិនបើអ្នកបរាជ័យ នោះអ្នកអាចរៀនសូត្រពីរបៀបដើម្បីជោគជ័យនៅពេលបន្ទាប់ទៀត ហើយត្រូវជឿជាក់លើខ្លួនឯង ព្រោះព្យាយាមហើយបរាជ័យ ប្រសើរជាងមិនបានព្យាយាមទាល់តែសោះ។
សម្រាប់ពិសិទ្ធ ចំណុចដ៏ល្អមួយនៅទីនេះគឺបរិយាកាសការងារដែលពិសិទ្ធមានអារម្មណ៍ថាទទួលបានការស្វាគមន៍ពីបុគ្គលិកទាំងអស់។
នៅទីនេះមានបរិយាកាសដ៏ល្អសម្រាប់ធ្វើការ ស្មារតីក្រុមមានភាពរឹងមាំ ហើយបុគ្គលិកមានភាពរួសរាយរាក់ទាក់ និងស្និទ្ធស្នាលគ្នាទៅវិញទៅមក ដោយតាំងពីខ្ញុំចូលមកទីនេះដំបូង ខ្ញុំមិនដែលមានអារម្មណ៍ថាម្នាក់ឯងនោះទេ។
ពិសិដ្ឋធ្លាប់ស្គាល់ USAID តាំងពីនៅតូច ដោយសារតែលោកប៉ារបស់ខ្លួនធ្លាប់ធ្វើការឱ្យអង្គការមិនមែនរដ្ឋាភិបាលមួយដែលគាំទ្រដោយ USAID ។
កញ្ញា រ៉ូនី លីណា
ទីកន្លែងកំណើត៖ ភ្នំពេញ
គ្រឹះស្ថានឧត្ដមសិក្សា៖ និសិត្សឆ្នាំទី៣ នៅសាកលវិទ្យាល័យអន្តរជាតិ ប៉ារ៉ាហ្គន ជំនាញទំនាក់ទំនងអន្តរជាតិ
មុខតំណែង៖ អ្នកហាត់ការផ្នែកធនធានមនុស្ស នៅទីភ្នាក់ងារជំនួយអាមេរិក (USAID) កម្ពុជា
លីណាបានជួបការលំបាកមួយចំនួនពេលចូលហាត់ការដំបូងនៅទីភ្នាក់ងារជំនួយអាមេរិក (USAID) កម្ពុជា។
លីណា៖ ខ្ញុំត្រូវរៀនសម្របខ្លួនទៅនឹងវប្បធម៌ និងបរិយាកាសការងារ ដូចជាកិច្ចការខ្លះពំុមានការណែនាំនៅក្នុងថ្នាក់ទេ ដូច្នេះខ្ញុំត្រូវឆ្លងកាត់បទពិសោធន៍នេះនិងធ្វើវាដោយខ្លួនឯង ហើយពេលខ្លះគឺរៀនពីកំហុសឡើងវិញ។
ក្រោយពីបានចូលរួមការងារស្មគ្រ័ចិត្តជាច្រើន និងហាត់ការនៅ USAID លីណាយល់ឃើញថាខ្លួនមានការរីកចម្រើនជាងមុន។
លីណាបន្តថា៖ "ទោះបីជាវាមានការលំបាកក៏ដោយ ប៉ុន្តែខ្ញុំមានអារម្មណ៍ថាទទួលបានសមិទ្ធផល និងមោទនភាពចំពោះខ្លួនឯង"។
លីណាចង់ជំរុញយុវជនឱ្យសាកល្បងអ្វីដែលថ្មី និងបានប្រាប់ថា៖ "ពីយុវជនម្នាក់ទៅយុវជនម្នាក់ទៀត ខ្ញុំគិតថាពួកគេគួរតែផ្តល់កម្លាំងចិត្តដល់ខ្លួនឯង ហើយជឿជាក់ថាយើងអាចធ្វើបាន និងព្យាយាមសាកល្បងអ្វីថ្មីៗ"។
លីណាប្រាប់ថា ខ្លួនចូលចិត្តធ្វើការជាមួយទីភ្នាក់ងារជំនួយអាមេរិក (USAID) កម្ពុជា ព្រោះទីនេះជាផ្នែកមួយដែលជួយឲ្យមានការផ្លាស់ប្តូរដោយផ្ទាល់នៅក្នុងប្រទេសកម្ពុជា។
លីណាបន្តថា៖ ខ្ញុំគិតថា USAID គឺជាកន្លែងមួយដែលខ្ញុំអាចអភិវឌ្ឍខ្លួនបាន ព្រោះវាជាកន្លែងដែលប្រជាជនកម្ពុជា និងអាមេរិកអាចសហការគ្នាដើម្បីបង្កើតការយល់ដឹងពីវប្បធម៌ និងជួយគ្នាសម្រេចនូវគោលដៅចម្បងជាច្រើនដែលកម្ពុជាត្រូវការ។
ចាប់តាំងពីថ្ងៃធ្វើការដំបូង លីណាទទួលបានការស្វាគមន៍យ៉ាងខ្លាំងពីក្រុមធនធានមនុស្ស និងបុគ្គលិកទាំងអស់ដែលធ្វើការនៅទីនេះ។
លីណានិយាយថា៖ “ពួកគាត់តែងតែសួរសុខទុក្ខខ្ញុំរាល់ពេលដែលជួបគ្នា ទេាះបីពួកគាត់បានធ្វើការនៅទីនេះជាច្រើនឆ្នាំក៏ដោយក៏តែងតែស្វាគមន៍ និងគាំទ្រខ្ញុំជានិច្ច”។
លោក ទ្រី លាងគ្រុយ
ទីកន្លែងកំណើត៖ ភ្នំពេញ
គ្រឹះស្ថានឧត្ដមសិក្សា៖ និសិត្សឆ្នាំទី៣ នៅសាកលវិទ្យាល័យអាមេរិកាំងភ្នំពេញ ជំនាញគ្រប់គ្រងពាណិជ្ជកម្ម
មុខតំណែង៖ អ្នកហាត់ការផ្នែករដ្ឋបាល នៅទីភ្នាក់ងារជំនួយអាមេរិក (USAID) កម្ពុជា
លាងគ្រុយបានដាក់ពាក្យចូលហាត់ការជាមួយ USAID ព្រោះចង់រៀនសូត្រ ពីបទពិសោធន៍ការងារក្នុងការិយាល័យរដ្ឋបាល ដូចជារបៀបជួយបុគ្គលិកក្នុងការធ្វើដំណើរជាដើម។
លាងគ្រុយនិយាយថា៖ ខ្ញុំពុំស្គាល់ទីភ្នាក់ងារជំនួយអាមេរិក (USAID) ពីមុនមកទេ ប៉ុន្តែខ្ញុំបានធ្វើការស្រាវជ្រាវខ្លះៗ ទើបដឹងថា USAID បានផ្តល់ជំនួយជាច្រើនដល់កម្ពុជា ដូចជាក្នុងសហគមន៍ លើវិស័យសេដ្ឋកិច្ច អប់រំ សុខាភិបាល និងបរិស្ថាន។
លាងគ្រុយប្រាប់ថាគាត់ រីករាយដែលបានប្រាស្រ័យទាក់ទងជាមួយបុគ្គលិកនៅទីនេះ និងទទួលបានការយល់ដឹងកាន់តែច្បាស់អំពីជនជាតិអាមេរិក។
លាងគ្រុយបន្តថា៖ ចំណាប់អារម្មណ៍ដំបូងរបស់ខ្ញុំគឺថា បុគ្គលិកនៅទីនេះមានភាពរួសរាយរាក់ទាក់ និងចិត្តល្អដល់អ្នកហាត់ការ ហើយខ្ញុំបានយល់ដឹងអំពីរចនាសម្ព័ន្ធនៃរបៀបដែលជនជាតិអាមេរិកធ្វើការ ដែលវាជាឱកាសដ៏ល្អមួយដែលខ្ញុំមានរហូតមកដល់បច្ចុប្បន្ននេះ។
លាងគ្រុយបានដឹងអំពីឱកាសការងារស្មើភាពគ្នា (EEO) ដែលធានាថាបុគ្គលិកគ្រប់រូបត្រូវបានការពារពីការរើសអើង និងការបៀតបៀនដោយខុសច្បាប់ ហើយម្នាក់ៗមានឱកាសស្មើៗគ្នា។ លាងគ្រុយមានគោលបំណងមួយក្នុងការលើកស្ទួយប្រព័ន្ធសុខាភិបាលនៅកម្ពុជា ដើម្បីឱ្យ ប្រជាជនដែលខ្វះខាតអាចទទួលបានសេវាថែទាំសុខភាព និងការព្យាបាល។
ក្នុងនាមជានិស្សិតផ្នែកធុរកិច្ច ខ្ញុំចង់វិនិយោគទៅលើវិស័យអប់រំហើយបង្កើនធនធានមនុស្ស ដើម្បីពួកគេអាចធ្វើការនៅក្នុងមន្ទីរពេទ្យ និងលើកកម្ពស់វិស័យសុខាភិបាល។
កញ្ញា ស៊ុន ស្រីនា
ទីកន្លែងកំណើត៖ ខេត្តក្រចេះ
គ្រឹះស្ថានឧត្ដមសិក្សា៖ និសិត្សឆ្នាំទី២ នៅសាកលវិទ្យាល័យភូមិន្ទភ្នំពេញ ជំនាញគ្រប់គ្រងប្រព័ន្ធផ្សព្វផ្សាយ
មុខតំណែង៖ អ្នកហាត់ការផ្នែកអភិវឌ្ឍន៍ផ្សព្វផ្សាយ និងទំនាក់ទំនង នៅទីភ្នាក់ងារជំនួយអាមេរិក (USAID) កម្ពុជា
បន្ទាប់ពីហាត់ការបានបីសប្តាហ៍ ស្រីនាទទួលបានចំណេះដឹងថ្មីៗ ក៏ដូចជាដឹកនាំគម្រោងមួយគឺតាក់តែងអំពីប្ររវត្តិរូបអ្នកហាត់ការផងដែរ។
ស្រីនានិយាយថា៖ កិច្ចការដ៏រំភើបមួយដែលខ្ញុំសម្រេចបាន គឺធ្វើការទៅលើប្រវត្តិរូបអ្នកហាត់ការរបស់ USAID ដោយមានការជ្រោមជ្រែងពីក្រុមការងារ ធ្វើឱ្យខ្ញុំមានឱកាសជំរុញ និងកសាងសមត្ថភាពខ្លួនឯងបន្ថែមទៀត។
ស្រីនាប្រាប់ថា៖ "គម្រោងនេះក៏បានបង្រៀនខ្ញុំអំពីសារៈសំខាន់នែការចេះសួររកជំនួយ និងចេះអត់ធ្មត់នៅពេលដែលខ្ញុំចង់សម្រេចគោលដៅណាមួយ"។
ស្រីនាបានសម្រេចចិត្តដាក់ពាក្យចូលហាត់ការជាមួយ USAID ព្រោះចង់ពង្រីកបទពិសោធន៍ក្នុងវិស័យទំនាក់ទំនង និងដើម្បីភាពរីកចម្រើនផ្ទាល់ខ្លួន។
ស្រីនាធ្លាប់ឃើញស្លាកសញ្ញា USAID នៅគ្រប់ទីកន្លែង ប៉ុន្តែពុំបានដឹងថាតំណាងអោយអ្វីនេាះទេ ហើយបានបន្តថា៖ "ពេលមកដល់ទីនេះ ទើបខ្ញុំបានឃើញរូបភាពកាន់តែទូលំទូលាយអំពីសមិទ្ធផលរបស់ USAID ជាពិសេសទៅលើវិស័យអប់រំនៅទូទាំងសាលារៀនក្នុងប្រទេសកម្ពុជា។”
ស្រីនាមានពេលវេលាល្អធ្វើការនៅ USAID ដោយបានប្រាប់ថា៖ "ខ្ញុំរីករាយនឹងមកធ្វើការនៅទីនេះ ព្រោះខ្ញុំមានឱកាសបានជួបបុគ្គលិកជាច្រើនដែលរួសរាយរាក់ទាក់ ចិត្តល្អ និងមានទេពកោសល្យ"។
គោលដៅមួយរបស់ស្រីនា គឺជួយយុវជនក្នុងការត្រៀមខ្លួនសម្រាប់ចូលសាកលវិទ្យាល័យ ដើម្បីពួកគេមានសមត្ថភាពជួយខ្លួនឯង និងសហគមន៍នាពេលអនាគត។
ស្រីនាបន្តថា៖ សម្រាប់ខ្ញុំ ការសិក្សាថ្នាក់ឧត្តមសិក្សាគឺជារឿងដ៏ល្អមួយ ដោយសារខ្ញុំមិនត្រឹមតែបានរៀនមេរៀននៅក្នុងសាលាតែប៉ុណ្ណោះទេ ខ្ញុំក៏បានរៀនអំពីការប្តេជ្ញាចិត្ត មានវិន័យផ្ទាល់ខ្លួន និងរៀនបត់បែនទៅតាមការផ្លាស់ប្តូរថ្មីៗក្នុងវ័យជាយុវជន។
---------------------------------------------------------------------
អ្នកនិពន្ធអត្ថបទ៖ កញ្ញា ស៊ុន ស្រីនា អ្នកហាត់ការផ្នែកអភិវឌ្ឍន៍ផ្សព្វផ្សាយ និងទំនាក់ទំនង នៃទីភ្នាក់ងារជំនួយអាមេរិក (USAID) កម្ពុជា
USAID/Cambodia/Youra Soeum